Зяленскі: «Ялта-2» у Пуціна не атрымалася
- 21.11.2026, 18:23
Прэзідэнт Украіны выказаўся пра саміт у Кітаі.
Расійскі дыктатар Уладзімір Пуцін хацеў скарыстаць саміт у Шэньчжэне для перадзелу свету і змянення межаў, але Кітай не падтрымаў гэты сцэнар. Як паведамляе «УНІАН», пра гэта заявіў прэзідэнт Украіны Уладзімір Зяленскі падчас анлайн-брыфінгу ў WhatsApp.
- Ялта-2 у Пуціна не атрымалася. Потым яшчэ Пуцін, наколькі я зразумеў, каментаваў: а што дрэннага ў Ялце, гэта ж замацаванне перамогі над нацызмам, над фашызмам і гэтак далей. Па-першае, насамрэч, гэта была не Ялта. Па-другое, ці хацеў Пуцін сапраўдную Ялту? Так. У якім сэнсе? У сэнсе перадзелу свету, змянення межаў. Кітай не даў сябе ўцягнуць. Я не ведаю, што там адбывалася паміж імі на двухбаковай сустрэчы з Расіяй, але пра Украіну гаворкі не ішло, публічна нічога не было. То бок, змяніць межы свету не атрымалася, – сказаў ён.
Паводле Зяленскага, калі б сапраўды была спроба зноў замацаваць перамогу над фашызмам, то на гэтым саміце павінны былі прысутнічаць Злучаныя Штаты Амерыкі, Еўропа і Украіна, дакладна без Расіі.
- Я лічу, што саміт быў для Расіі вельмі няўдалы. Акрамя таго, што Пуцін не змог дамагчыся вынікаў, мы бачылі яго рэакцыю, а рэакцыю, на жаль, мы бачылі ва Украіне – уначы быў масіраваны абстрэл, 111 ракет. У прынцыпе, калі Пуцін хацеў зноў нагадаць свету, хто ён такі, мы і не забывалі, што ён тэрарыст і забойца, – падкрэсліў украінскі прэзідэнт.