Вайскоўцаў ад грыпу ратуюць прышчэпкамі, цыбуляй і часныком
13- 4.11.2009, 15:34
Мерапрыемствы па папярэджанні ўзнікнення і распаўсюду ВРВІ і грыпу ва Узброеных Сілах Беларусі ажыццяўляюцца «ў планавым парадку».
Пра гэта карэспандэнту БелТА паведамілі ў прэс-службе Міністэрства абароны.
«Для абароны вайскоўцаў і грамадзянскага персанала Узброеных Сіл у перыяд сезоннага ўздыму захворвання на грып у вайсковых частках і арганізацыях Міністэрства абароны праводзіцца вакцынацыя. Для гэтых мэт па дзяржзамове на 2009 год з Міністэрства аховы здароўя было атрымана 47 тыс. доз вакцыны супраць грыпу», - распавялі ў абаронным ведамстве.
Таксама арганізаваны мерапрыемствы па раннім выяўленні хворых у падраздзяленнях, узмоцнены медыцынскі кантроль за вайскоўцамі, якія прыбываюць з камандзіровак, звальненняў і адпачынкаў. Прыняты меры па выключэнні выпадкаў пераахаладжэння вайскоўцаў у перыяд выканання імі сваіх абавязкаў. Ажыццяўляецца кантроль за падтрыманнем усталяванага тэмпературнага рэжыму ў казармах і службовых памяшканнях. Для падвышэння ахоўных сіл арганізма вайскоўцам дадаткова выдаецца цыбуля ці часнык.
Штодня інфармацыя пра захворванне з вайсковых частак і арганізацый Узброеных Сіл паступае ў 23-і санітарна-эпідэміялагічны цэнтр, дзе праводзіцца яе аналіз, пасля чаго гэта інфармацыя падаецца ў ваенна-медыцынскае ўпраўленне Міністэрствы абароны.
