Дырыжор ваеннага аркестра пастаўляў наркотыкі афіцэрам
3- 11.02.2009, 16:46
Канал пастаўкі наркотыкаў у Беларусь з Расеі перакрыты ў Асіповічах. Дырыжор ваеннага аркестра забяспечваў афіцэраў вайсковай часткі наркотыкамі.
Пры правядзенні сумесных аператыўна-вышуковых мерапрыемстваў супрацоўнікі аддзела па наркакантролі і процідзеянні гандлю людзьмі Асіповіцкага РАУС і ваеннай контрвыведкі за захоўванне і рэалізацыю наркатычных сродкаў затрымалі дырыжора ваеннага аркестра, капітана, старэйшага лейтэнанта і камандзіра батарэі адной з вайсковых частак, якія дыслакуюцца ў Асіповічах.
У пакоі афіцэрскага інтэрната, дзе пражываў дырыжор ваеннага аркестра, было выяўлена звыш за 10 грамаў амфетаміну і некалькі грамаў марыхуаны. Па словах ваеннага дырыжора, ён прывозіў наркотыкі з Санкт-Пецярбургу, забяспечваў амфетамінам камандзіра батарэі, а той рэалізоўваў марыхуану капітану. Пра далейшыя каналы «вайсковага» наркатрафіку следству невядома. У дачыненні да затрыманых узбуджаныя крымінальныя справы.
