Свінец у дзіцячай кілбасе (Фотафакт)

Фатограф Павел Паташнікаў размясціў у сваім мікраблогу паведамленне аб выяўленні металічнага прадмета ў набытай кілбасе «Дзіцячая».

Onliner.by высвятляў падрабязнасці інцыдэнту.

У тэлефоннай гутарцы Павел паведаміў, што выявіў металічны прадмет выпадкова. «Раніцай я рыхтаваў сняданак. Дастаў на днях набытую вараную кілбасу. Калі адрэзаў чарговы кавалачак, пабачыў на металічны прадмет. Дастаў яго для агляду. Знешне нагадвае свінец. Для вернасці прачытаў склад - там пра свінец нічога не знайшоў», - распавёў фатограф.

Галоўны тэхнолаг завода-вытворцы СЗАТ «Белатміт» Тацяна Дзмітрыеўна паведаміла ў тэлефоннай размове, што гэта першы падобны выпадак за ўсю гісторыю працы прадпрыемства. Па ейных словах, у Менск ужо адпраўлены спецыяліст, які правядзе аналіз знойдзенага аб'екта. Гэта дасць магчымасць вызначыць крыніцу паходжання знаходкі. Тацяна Дзмітрыеўна таксама паведаміла, што якасць выпускаемай прадукцыі гарантуецца сістэмай тэхнічнага кантролю прадпрыемства.

На пытанне аб тым, ці плануе Павел ініцыяваць судовы разгляд з вытворцам кілбасы, той адказаў адмоўна. Незалежную экспертызу сваёй знаходкі ён таксама праводзіць не мае намеру - абмежаваўся толькі публікацыяй здымкаў у Інтэрнэце.