У Менску ўсталявалі памятную дошку ў гонар Каліноўскага
23- 6.08.2013, 17:13
- 16,696
Памятную дошку з бюстам Каліноўскага і яго кароткай біяграфіяй усталявалі на будынку па вуліцы Каліноўскага, 55.
Адбылося гэта ў сярэдзіне ліпеня гэтага года.
Вуліца ў гонар беларускага рэвалюцыянера-дэмакрата, мысляра і публіцыста ў сталіцы з'явілася ў 1963 годзе - роўна праз сто гадоў пасля паўстання. Важным аб'ектам гэтага раёна з 1975-га года заўсёды быў гандлёва-грамадскі цэнтр з кінатэатрам «Вільнюс» па вуліцы Каліноўскага, 55, які пасля рэканструкцыі ператварыўся ў Палац барацьбы. Мала хто ведае, што ў 80-я гады мінулага стагоддзя менавіта на будынку кінатэатра «Вільнюс» усталявалі памятную дошку ў гонар Каліноўскага, якая скандальна знікла ў 1998 годзе, піша artsiadziba.by.
Пра гісторыю вяртання памятнай дошкі на гістарычнае месца распавёў намеснік кіраўніка адміністрацыі Першамайскага раёна Аляксей Каштальян:
«Пасля заканчэння рэканструкцыі будынка на вуліцы Каліноўскага, 55 мы ў ліпені гэтага года вярнулі на гістарычнае месца памятную дошку ў гонар Кастуся Каліноўскага. Яна і раней вісела на гэтым месцы, калі там быў яшчэ кінатэатр «Вільнюс». Але ў 1998-м годзе шыльду скралі. Пасля яе адшукалі і перадалі на захаванне і аднаўленне ў Першамайскае ЖРЭА, бо будынак быў на рэканструкцыі. А цяпер, пасля адкрыцця будынка, шыльда зноў вярнулася на ранейшае месца, таму ніякіх імпрэз і прэзентацый мы не рабілі».
Цікава, што пра планы вяртання ў Менску памятнай дошкі Кастусю Каліноўскаму ніхто не ведаў і ў СМІ пра гэта не паведамлялася.