Студэнтаў, якія ўдзельнічалі ў маршы пратэсту, выклікаюць у адміністрацыю
17- 3.12.2015, 16:39
- 43,153
Студэнта філалагічнага факультэта БДУ Глеба Вайкуле ў чацвер выклікалі на камісію па пропусках.
Са словаў студэнта, ён не прапускае заняткі ўжо месяц, а за ўсе мінулыя пропускі пытанняў да яго не было. Праблемы з'явіліся пасля Маршу студэнтаў, у якім ён удзельнічаў.
Вось што студэнт другога курсу Глеб Вайкуле распавёў «Еўрарадыё»:
«Камісія будзе праходзіць у кабінеце дэкана. Там, хутчэй за ўсё, буду не я адзін. Цяпер у мяне няма пропускаў, я чатыры тыдні хаджу на ўсе пары. Я толькі ўчора не быў, але ёсць даведка. У мяне былі пропускі раней, але я напісаў тлумачальныя па ўсіх пропусках і да маршу гэта нікога не цікавіла».
Нагадаем, днём 2 снежня ў цэнтры Менска прайшоў студэнцкі марш «Любоў і справядлівасць», арганізаваны рухам «Студэнты супраць». Сваёй акцыяй яны хацелі дамагчыся ад кіраўніцтва ВНУ «скасавання платных пераздач і адпрацовак», «спынення ціску на студэнтаў», «роспуску Асамблеі БДУ і стварэння новага органа студэнцкага самакіравання».
Студэнты прайшлі маршам ад Міхайлаўскага сквера да галоўнага корпуса БДУ, дзе правялі перфоманс з патрабаваннем сустрэчы з рэктарам універсітэта Сяргеем Абламейкам. Аднак ён пабаяўся выходзіць да пратэстоўцаў.