Амапаўцы не пусцілі Мікалая Статкевіча з сям'ёй у парк у навагоднюю ноч

Міліцыянт патлумачыў адмову прапусціць палітыка «зачысткай тэрыторыі».

Пра кур'ёзны выпадак, які адбыўся ў навагоднюю ноч, піша на сваёй старонцы ў сацсетцы «Фэйсбук» Марына Адамовіч, жонка лідара беларускай апазіцыі Мікалая Статкевіча.

Напярэдадні выхаду з дому палітык паклаў у кішэню мабільнік і пажартаваў, што бярэ «маячок», каб «гэтыя не расслабляліся». Па дарозе да парку яны сустракалі невялікія кампаніі мірна адпачываючых людзей. Са слоў Марыны Адамовіч, «нічога не прадвяшчала» непрыемнасцяў.

«Ужо на ўваходзе ў парк, побач з мастком цераз ручай, ад дрэва аддзяліўся і рашуча накіраваўся нам напярэймы бравы прадстаўнік праваахоўных органаў - амапавец», - распавядае яна.

Служыцель закона на здзіўленне ветліва прапанаваў Мікалаю Статкевічу і яго жонцы вярнуцца дадому, бо «ўваход у парк забаронены. Масавае мерапрыемства скончанае і зараз будзе праводзіцца зачыстка тэрыторыі», - патлумачыў ён.

На пытанні пра прозвішча, месца службы, нарматыўны дакумент, якім ён кіруецца, амапавец адказаць не змог. Праўда, пасля слова «закон» з засады на дапамогу выехаў аўтамабіль з падмацаваннем. Афіцэр, які знаходзіўся ў ім, толькі з трэцяй спробы ўсё ж такі здолеў прадставіцца.

«Высвятляецца, навагодняя» зачыстка тэрыторыі «праводзіцца на падставе закона аб масавых мерапрыемстваў. Карацей, у парк мы ўсё ж прайшлі - сілы былі няроўныя (з нашага боку я была). Зачысткі не назіралася», - жартуе жонка палітыка.

З гэтай сітуацыі з катэгорыі сюррэалізму Марына Адамовіч робіць выснову, што «зачысціць» спрабавалі толькі іх з мужам, каб амапаўцам не хадзіць следам.