Reuters: Ракетны фрэгат РФ з верталётам рухаецца ў кірунку Азоўскага мора

Карабель заўважылі ля Феадосіі.

Расейскі ракетны фрэгат рухаецца ў кірунку Азоўскага мора, паведамляе Reuters са спасылкай на відавочцаў.

Са слоў суразмоўцы агенцтва, фрэгат рухаецца ў 1,5 марской мілі ад берага ля Феадосіі ў акупаваным Крыме.

На борце фрэгата бачны верталёт, піша агенцтва.

28 лістапада паведамлялася, што з Чорнага ў Азоўскае мора адправіўся расейскі марскі тральшчык «Віцэ-адмірал Захар'ін».

Нагадаем, раніцай 25 лістапада памежныя караблі РФ ажыццявілі агрэсіўныя дзеянні супраць трох караблёў ВМС ВС Украіны падчас іх пераходу з порта Адэсы ў порт Марыупаль Азоўскага мора. У выніку тарана памежнага карабля РФ быў пашкоджаны буксір ВМС Украіны.

У гэты ж дзень украінскія караблі былі абстраляныя і захопленыя расейскім спецназам.

26 лістапада Вярхоўная Рада прагаласавала за ўвядзенне ваеннага становішча ў абласцях, якія мяжуюць з РФ, размешчаных уздоўж прыднястроўскага адрэзка ўкраінскай-малдоўскай мяжы, уздоўж узбярэжжа Чорнага і Азоўскага мораў.