Чаму вэнэсуэльцы паўсталі

Вэнэсуэльская гіперінфляцыя ў фотаздымках.

Падзеі ў Вэнэсуэле прыкавалі ўвагу ўсяго свету. Каб нашы чытачы лепш зразумелі сітуацыю ў краіне, мы публікуем артыкул ВВС з лета 2018 года.

Улады Вэнэсуэлы з панядзелка ўвялі шэраг захадаў, накіраваных на барацьбу з наймацнейшым эканамічным крызісам, які ахапіў краіну ў апошнія гады. Адна з галоўных задач - барацьба з гіпэрінфляцыяй, якая, паводле прагнозаў МВФ, пад канец года можа дасягнуць 1 млн адсоткаў.

Адны з ключавых захадаў, якія ўводзіць вэнэсуэльскі ўрад, - гэта мадэрнізацыя нацыянальнай валюты краіны, балівара. Улады наважылі правесці адну з самых маштабных дэнамінацый у сусветнай гісторыі і ўвесці ў абарачэнне так званы суверэнны балівар.

Адзін суверэнны Балівар роўны 100 тысячам "старых" вэнэсуэльскіх балівараў. Такім чынам, афіцыйны абменны курс балівара быў зніжаны на 96%.

На фоне і без таго напружанай атмасферы ў вэнэсуэльскім грамадстве аб'ява Мадуры выклікала дадатковую трывогу ў грамадзян - СМІ паведамляюць, што чэргі ў крамах Каракаса ў канцы тыдня сталі значна большыя, чым звычайна.

Фотакарэспандэнт агенцтва Ройтэрс Карлас Гарсія Роўлінс наважыў навочна прадэманстраваць катастрафічныя маштабы вэнэсуэльскай інфляцыі і паказаць, колькі трэба ўзяць з сабой грошай, каб купіць базавыя штодзённыя прадукты.

Напрыклад, каб купіць курыцу вагой 2,4 кг, вам давядзецца выкласці прыкладна 14,6 млн балівараў (2,2 даляра).

Кошт аднаго кілаграма мяса можа даходзіць да 9,5 млн балівараў. Пры гэтым мінімальны заробак у краіне да ўвядзення новай валюты складаў толькі 3 млн балівараў (0,89 даляра).

Як чакаецца, пасля ўвядзення новых захадаў мінімальны памер аплаты працы мае дасягнуць 180 млн балівараў (блізу 30 даляраў).

Шмат хто з вэнэсуэльцаў сёння з цяжкасцю можа сабе дазволіць набыць не толькі базавыя прадукты харчавання, але і звычайныя прадметы асабовай гігіены. Напрыклад, гэты брусок мыла каштуе 3,5 млн балівараў, што толькі трохі перасягае суму мінімальнага заробку.

Да ўвядзення ў абарачэнне суверэннага балівара самая вялікая грашовая купюра ў краіне мела намінал 100 тысяч балівараў (крыху менш за 0,3 даляра). Адной з прычын дэнамінацыі балівара стала нястача папяровых грошай у краіне.

Цяпер у Вэнэсуэле ўводзяцца банкноты наміналам ад 2 да 500 суверэнных балівараў. Такім чынам, вартасць мінімальнай купюры складае 200 тысяч "старых" балівараў.

Праблема ў тым, што старая сістэма разліку балівараў нейкі час будзе суіснаваць з новай, што можа прычыніцца да блытаніны.

"Я не разумею гэтага пераразліку, улады не патлумачылі, як ён працуе і якія будуць заробкі. Як мы будзем купляць, калі нават не бачылі новых цэннікаў?" - паскардзілася агенцтву Ройтэрс жыхарка горада Сан-Крыстабаля Юрайма Галавіс.

Раз шмат хто з жыхароў Вэнэсуэлы не мае банкавых картак, ім даводзіцца ўвесь час насіць з сабой вялізныя стосы грошай, нават калі яны выходзяць купіць толькі пачак масла або маргарыну.

Панядзелак у Вэнэсуэле быў абвешчаны непрацоўным днём. Праз пераход на новую валюту ўсе банкавыя аперацыі ў інтэрнэце былі прыпыненыя на некалькі гадзін.

Нікалас Мадура у сваім "Твітэры" назваў валютную рэформу ў краіне гістарычнай эканамічнай пераменай і паабяцаў дасягнуць стабільнага балансу ў эканоміцы і макраэканоміцы.

У той жа час адзін з лідараў апазіцыі краіны Энрыке Капрылес на сваім сайце ахарактарызаваў зробленыя захады як "фінальны ўдар" па эканоміцы краіны і абвінаваціў Мадуру тым, што ён морыць голадам уласны народ.