Менск звярнуўся да Масквы з новай просьбай праз нізкую якасць нафты

Беларускія ўлады папрасілі «Транснафту» павялічыць прапампоўванне нафты па паўночнай галінцы нафтаправода «Дружба».

Генеральны дырэктар ААТ «Нафтан» Аляксандр Дзямідаў заявіў аб тым, што Менск накіраваў зварот у «Транснафту» з просьбай павялічыць прапампоўванне па нафтаправодзе Сургут - Полацк, паведамляе агенцтва «РИА Новости». З ягоных слоў, тэхнічныя магчымасці для гэтага ёсць, а сам трубаправод цяпер працуе толькі на 10% ад сваёй загрузкі.

Дзямідаў патлумачыў гэтую просьбу тым, што на паўднёвай галінцы нафтаправода «Дружба» было зафіксавана паступленне няякаснай нафты. Пры гэтым у «Нафтана» (у адрозненне ад Мазырскага НПЗ) ёсць магчымасць атрымліваць нафту з абодвух галінак.

У сваю чаргу, генеральны дырэктар прадпрыемства «Гомельтранснафта Дружба» Алег Барысенка адзначыў, што ўтрыманне хларыдаў у нафце, што паступае з Расеі, перавышае норму ў 17 разоў, аднак пакрысе якасць паляпшаецца, паведамляе агенцтва БелТА.

Адначасова намеснік старшыні канцэрна «Белнафтахім» Уладзімір Сізаў распавёў пра часовае абмежаванне экспартных паставак нафтапрадуктаў з Беларусі за мяжу. «З улікам правядзення пасяўной кампаніі, неабходнасці забеспячэння ўнутранага рынку, наяўных рызык перапрацоўкі сыравіны з пагаршэннем якасці намі прынятая пастанова аб часовым абмежаванні паставак нафтапрадуктаў у экспартных напрамках», - сказаў ён.

Намеснік прэм'ер-міністра Беларусі Ігар Ляшэнка заявіў, што, паводле інфармацыі расейскага боку, сітуацыя з якасцю нафты павінна паляпшацца кожны дзень. З ягоных слоў, 23 красавіка прадстаўнікі беларускіх НПЗ адправяцца ў «Транснафту» для абмеркавання сітуацыі.