Парламент Малдовы прызнаў краіну «захопленай дзяржавай»

Парламенцкая большасць Малдовы прагаласавала за дэкларацыю аб захопленай дзяржаве.

Пра гэта паведамляе NewsMaker.

Прадстаўнік праеўрапейскага блока ACUM Андрэй Нэстасе зачытаў дэкларацыю, у якой гаворыцца аб ануляванні змяшанай выбарчай сістэмы і выказваннi вотуму недаверу Канстытуцыйнаму суду краіны. Там змяшчаецца патрабаванне адправіць у адстаўку кіраўніка Службы інфармацыі і бяспекі і кіраўніка Нацыянальнага цэнтра барацьбы з карупцыяй.

Нэстасе таксама прапанаваў звярнуцца ў ЕСПЧ у сувязі з тым, што Канстытуцыйны суд Малдовы прымае пастановы, якія супярэчаць закону.

Раней КС Малдовы пастанавіў, што парламент падлягае роспуску. Тэрмін зацвярджэння новага ўрада абранага 24 лютага абноўленым складам парламента скончыўся апоўначы 8 чэрвеня, заявілі ў судзе. Напярэдадні прэзідэнт краіны Ігар Дадон дапусціў магчымасць правядзення датэрміновых парламенцкіх выбараў.

Нагадаем, 24 лютага 2019 года ў Малдове адбыліся парламенцкія выбары. Іх вынікі былі зацверджаны 10 сакавіка.

У выніку выбараў у новым парламенце Малдовы прадстаўленая прарасейская левая Партыя сацыялістаў (35 мандатаў), левацэнтрысцкая Дэмакратычная партыя Улады Плахатнюка (30), блок двух праеўрапейскіх партый Acum (26), папулісцкая партыя Шор (7) і яшчэ тры незалежныя дэпутаты (усяго 101).