Юры Поклад: Менскае «Дынама» як бы пачынае працаваць наноў
1- 13.07.2019, 14:17
- 6,671
Спартовы дырэктар менскага «Дынама» Юры Поклад выказаўся пра планы развіцця клуба.
Інтэрв'ю выйшла ў «Спартовай Панараме».
– Як кіроўнае звяно, так і трэнерскі штаб пачалі працу не з пачатку сезону, таму перш за ўсё ўсім нам трэба разабрацца, якая ў нас сітуацыя. Ацаніць рэзерв, зразумець, наколькі ягоныя прадстаўнікі перспектыўныя і канкурэнтаздольныя, ці падыходзяць пад тую мадэль гульні, якую будзе прапаведаваць Сяргей Віталевіч. Гэта важна. Можа быць шмат праблемаў. Так што справа тут за Гурэнкам, бо ацэньвае ён. З іншага боку, у клуба павінна быць генеральная лінія ў пытанні развіцця.
Сёння пра гэта трэба думаць, але цяпер гэта не прыярытэтная задача. Папросту няма часу. На парадку дня адказы на больш асноватворныя, глабальныя пытанні, якія тычацца функцыянавання ЗАТ. З маладымі хлопцамі з дубля ўжо вядзецца праца – сустракаемся, размаўляем. Шмат каму будуць палепшаныя ўмовы працоўных стасункаў.
– Тады праясніцца, з чым трэба разабрацца ў першую чаргу? Стабілізаваць фінансаванне?
– Дакладна так. Ды і ўвогуле, клуб як бы пачынае працаваць нанова. Змена ўласніка не магла не адбіцца на ўсіх унутраных працэсах ФК «Дынама». Маніторынг спонсараў, разуменне ўласных магчымасцяў і гэтак далей – усё гэта справы цяперашняга дня. Магу сказаць, што офіс клуба пераязджае з праспекта Пераможцаў на стадыён «Дынама». Разумеем важнасць вяртання клуба ў свой куток. Усім гэтым трэба займацца, і развязаць імгненна ўсё гэта немагчыма, – сказаў Поклад.