Чатырохразовы чэмпіён Беларусі ў складзе «Нёмана» прадоўжыць кар'еру ў Румыніі

Хакеіст Максім Саманькоў стаў гульцом «Чыксерэды».

Беларускі галкіпер Максім Саманькоў (1989) упершыню ў кар'еры падаўся на легіянерскі хлеб. 29-гадовы брамнік дасягнуў дамоўленасці аб кантракце з румынскай «Чыксерэдай» з горада Меркура-Чук, якая выступае ў адкрытым чэмпіянаце Вугоршчыны (Erste Liga), піша pressball.by.

Цягам апошніх сямі гадоў выхаванец наваполацкага хакея выступаў за «Нёман», у складзе якога стаў чатырохразовым чэмпіёнам Беларусі, а таксама ўладальнікам Кантынентальнага кубка.

Таксама ў актыве Саманькова значыцца два таварыскія матчы ў складзе нацыянальнай каманды Беларусі.

Да «Чыксерэды» галкіпер далучыцца 15 жніўня.