Беларусы змогуць убачыць відовішчны метэарытны дождж

Яго можна будзе ўбачыць няўзброеным вокам.

У найбліжэйшыя дні жыхары паўночнага паўшар'я атрымаюць унікальную магчымасць назіраць за метэарытным дажджом Драканіды. Гэта падзея пройдзе з 6 да 10 кастрычніка, а найвышэйшая актыўнасць метэораў чакаецца з 8 на 9 кастрычніка.

Інфармацыю пра будучы метэарытны дождж паведамляе Каралеўскі музей Грынвіча. Навукоўцы адзначаюць, што метэарытная плынь Драканідаў паходзіць ад аскепкаў каметы 21 P/Джакабіні-Цынера. Таксама яны прагназуюць інтэнсіўнасць плыні да 20 метэораў за гадзіну. Хуткасць метэораў будзе залежаць ад таго, наколькі блізка камета перасячэ зямную арбіту сёлета.

Для назірання за Драканідамі лепш за ўсё выбраць вечаровы час пасля заходу, прыкладна пасля 22:00. Звычайна за падобнымі відовішчамі лепш за ўсё назіраць удалечыні ад гарадоў з іх светлавым і газавым забруджваннем. Драканіды лепш за ўсё бачныя на паўночна-заходняй частцы неба, крыху лявей і вышэй за сузор'е Вялікай Мядзведзіцы.

Спецыялісты адзначаюць, каб атрымаць асалоду ад метэарытнага дажджу Драканіды, не спатрэбіцца ніякіх спецыяльных прыбораў.

Назва «Драканіды» звязаная з тым, што метэоры, здаецца, рухаюцца ў бок Зямлі з сузор'я Дракона. Часам гэтую метэарытную плынь таксама называюць Джакабінідамі, у гонар адкрывальніка каметы 21 P/Джакабіні-Цынера Мішэля Джакабіні.