Улады Курскай вобласці РФ заявілі пра атаку дрона

Тры вёскі засталіся без святла.

Сёння, 23 траўня, увечары ў Курскай вобласці РФ нібыта атакавалі падстанцыю. Тры населеныя пункты абясточаныя.

Пра гэта паведамляе РБК-Украіна са спасылкай на губернатара Курскай вобласці Рамана Старавойта ў Telegram.

«У Суджанскім раёне беспілотнік скінуў выбуховую прыладу на падстанцыю. У выніку абясточаныя вёскі Плехава, Гуева і Горналь», – напісаў Старавойт.

Паводле ягоных словаў, цяпер у раёне вёсак праводзяцца рамонтныя працы. Пры гэтым губернатар удакладніў, што ніхто не пацярпеў.

Варта зазначыць, што расейцы ўжо неаднаразова заяўлялі пра напады і абстрэлы Курскай вобласці, якая мяжуе з Украінай. Напрыклад, некалькі тыдняў таму Старавойт таксама расказваў пра пашкоджанне падстанцыі ў рэгіёне. У атацы ён абвінаваціў украінскіх вайскоўцаў.