Зяленскі правёў сустрэчу з Барэлем

Што абмяркоўвалі.

Прэзідэнт Украіны Уладзімір Зяленскі правёў сустрэчу з Высокім прадстаўніком Еўрапейскага Звязу ў замежных справах і палітыцы бяспекі, віцэ-прэзідэнтам Еўрапейскай камісіі Жазэпам Барэлем. Пра гэта ідзе размова на сайце прэзідэнта Украіны.

«Дзякуй за візіт вашай каманды ва Украіну. Дзякуй за падтрымку ўкраінскага народа. Вы заўсёды былі з намі ў цяжкія моманты. У часы складаных выклікаў вы заўсёды былі на баку Украіны, украінцаў у нашай барацьбе за жыццё, суверэнітэт і незалежнасць», – адзначыў Зяленскі.

Суразмоўцы абмеркавалі супрацоўніцтва Украіны і ЕЗ у сферы бяспекі, у тым ліку першачарговыя патрэбы ўкраінскіх Сілаў абароны і важнасць паскарэння рэалізацыі плану ЕЗ у пастаўцы ва Украіну 1 млн артылерыйскіх боепрыпасаў.

Высокі прадстаўнік ЕЗ запэўніў, што да канца гэтага года ва Украіну будзе дастаўлены мільён артылерыйскіх боепрыпасаў. Ён таксама адзначыў важнасць падаўжэння фінансавай падтрымкі Украіны з боку ЕЗ.

Зяленскі акцэнтаваў увагу на неабходнасці вызначыць Украіну прыярытэтным кірункам экспарту артылерыйскіх боепрыпасаў і павялічыць колькасць заказаў і кантрактаў на іх вытворчасць з боку дзяржаваў – чальцоў ЕЗ.

«Спыніць экспарт артылерыйскіх боепрыпасаў у трэція краіны ЕЗ – гэта адзіна магчымая правільная пастанова пры сучасных выкліках бяспекі», – адзначыў ён.

Уладзімір Зяленскі і Жазэп Барэль таксама абмеркавалі законапраект аб узмацненні мабілізацыі, прыняты сёння Вярхоўнай Радай Украіны ў першым чытанні.

«Для мяне вялікі гонар быць зноў прынятым прэзідэнтам Украіны Уладзімірам Зяленскім. Ён папрасіў дадатковыя боепрыпасы, беспілотнікі і сістэмы СПА. Мабілізацыя дадатковай вайсковай тэхнікі ЕЗ для Украіны з'яўляецца маім прыярытэтам. Мы павінны зрабіць больш і зрабіць гэта хутчэй», – заявіў пасля сустрэчы Барэль.