Алесь Беляцкі перадаў Папу Рымскаму асабістае пасланне

Праваабаронца назваў рэжым Лукашэнкі саўдзельнікам агрэсіі супраць Украіны.

Падчас сустрэчы з Папам Рымскім Львам XIV Алесь Беляцкі распавёў пра сітуацыю з правамі чалавека ў Беларусі і папрасіў аб малітве і ўвазе да «гуманітарнай катастрофы, якая разгортваецца ў нашай краіне», піша «Хрысціянская візія».

Адзначаецца, што праваабаронца перадаў пантыфіку «асабістае пасланне».

У ім Беляцкі «апісвае сітуацыю з правамі чалавека і свабодай веравызнання ў Беларусі». «Ён нагадвае, што сёння ў краіне знаходзіцца каля тысячы палітычных зняволеных, сярод іх жанчыны і пажылыя людзі, хворыя і інваліды, шматдзетныя бацькі. Асобна праваабаронца піша пра пераслед вернікаў і святароў розных канфесій: каталіцкай, праваслаўнай і пратэстанцкай. Ён узгадвае айца Анатоля Парахневіча, арыштаванага ў сакавіку 2026 года, які перажыў інфаркт у зняволенні, але працягвае заставацца за кратамі», — удакладняе ініцыятыва.

Беляцкі ў пасланні таксама выказвае падзяку Святому Пасаду за вызваленне святароў Генрыха Акалатовіча і Анджэя Юхневіча у лістападзе 2025 года, аднак адзначае, што «пераслед не спыніўся: святары не могуць вярнуцца ў свае парафіі, а іх маёмасць канфіскавана».

Праваабаронца таксама звяртае ўвагу Папы Рымскага на «сістэматычнае знішчэнне рэжымам прававых падстаў для служэння Каталіцкай царквы ў Беларусі: закрыццё храмаў, у тым ліку касцёла святых Сымона і Алены ў Мінску, скасаванне рэгістрацыі грэка-каталіцкіх супольнасцей, дэпартацыю місіянераў». Ён паведаміў, што «сотні тысяч беларусаў, уключаючы каталіцкіх і праваслаўных святароў, былі вымушаныя пакінуць краіну, ратуючыся ад рэпрэсій».

Асобна Беляцкі звяртаецца да нядаўняй энцыклікі папы Magnifica Humanitas, падкрэсліваючы яе цэнтральны тэзіс: непахіснасць і ўніверсальнасць правоў чалавека, заснаваных на чалавечай годнасці. «Для праваабаронцы, які заплаціў за сваю працу гадамі зняволення, гэтыя словы маюць асаблівую вагу: тое, што ён бачыў і перажыў за кратамі, было перадусім сістэмнай спробай пазбавіць чалавека яго годнасці», — гаворыцца ў паведамленні.

Значная частка паслання Беляцкага прысвечана «вайне Расіі супраць Украіны і ролі ў ёй рэжыму Лукашэнкі». Праваабаронца называе беларускі рэжым «саўдзельнікам гэтай вайны і крыніцай нестабільнасці ў Еўропе». Разам з тым ён падкрэслівае: «Беларускі народ супраць вайны, больш за 200 грамадзян Беларусі знаходзяцца за кратамі менавіта за крытыку вайны і салідарнасць з украінцамі. Беларускі народ хоча жыць мірна і ў згодзе з суседзямі, аднак рэжым Лукашэнкі несамастойны, і застаецца небяспека прамога ўцягвання Беларусі ў вайну».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com