«Белсату» спрабавалі перашкодзіць зняць сюжэт пра размаляваны помнік Леніну
5- 11.11.2009, 13:58
11 лістапада Наваградак наведала здымачная група тэлеканала «Белсат», каб зрабіць сюжэт пра помнік Леніну, які быў абліты фарбай.
Як распавёў прэс-службе БХД кіраўнік мясцовага аддзялення «Беларускай хрысціянскай дэмакратыі» Сяргей Ваўчок, працы журналістаў спрабавалі перашкодзіць супрацоўнікі ДАІ.
«Маю машыну спынілі супрацоўнікі ДАІ, - распавёў Сяргей Ваўчок. – Яны пачалі прыдумляць нейкія дзіўныя прычны для пратаколу: нібы, у мяне знятыя заднія сядзенні, а гэтага рабіць нельга».
Паводле Ваўчка, сапраўднай мэтай мясцовага ДАІ была машына здымачнай групы «Белсата».
«Як толькі яны ўбачылі, што машына тэлежурналістаў пачала рухацца, кінулі мяне і панесліся ў сапраўдную пагоню за супрацоўнікамі «Белсата». Дагналі іх, прымусілі спыніцца і пачалі зноў жа шукаць зачэпкі дзеля затрымання. Але такіх не знайшлося, таму машыну «Белсата» міліцыянты ўсё ж такі адпусцілі», -- заявіў актывіст.
Нагадаем, што ўначы 7 лістапада невядомыя аблілі помнік Леніну ў цэнтры Наваградка зялёнай фарбай. Па справе аблітага фарбай помніка супрацоўнікі міліцыі дапыталі актывістку «Маладога фронта» Дар’ю Бахур.
