Сеч-Майдан рыхтуецца да абароны ад «янычараў» (Відэа)
23- 11.12.2013, 20:13
- 45,865
Цэнтральная плошча Кіева ператвараецца ў непрыступную цытадэль.
Актывісты з велізарным энтузіязмам будуюць барыкады. Людзі будуюць насыпы са снегу, а таксама засыпаюць яго ў мяхі і складаюць іх адзін на аднаго. Ва ўжытак ідуць усе падручныя сродкі. На будаўніцтве барыкад заўважаная і «зварка», паведамляе «Цензор.нет».
Журналісты і ўсе прысутныя на Майдане Незалежнасці адзначаюць, што галоўны пляц Украіны за сённяшні дзень ператварыўся ў асобную Запарожскую Сеч і ўсё больш нагадвае непрыступную цытадэль.
З самай раніцы ў цэнтр Кіева прыйшла вельмі вялікая колькасць людзей, якая пад вечар толькі павялічылася, нягледзячы на даволі моцныя маразы. СМІ паведамляюць аб 25-30 тысячах удзельнікаў, аднак дакладную колькасць вельмі складана ацаніць, бо частка мітынгоўцаў ўвесь час ходзіць па Хрышчаціку і Майдану Незалежнасці, а таксама грэецца ў памяшканнях, занятых актывістамі, час ад часу змяняючы адзін аднаго на вуліцы і барыкадах.
«Снег нам у помач! Ён насыпаецца ў мяхі і высыпаецца на ўмацаванне паркана. Відаць, гэтым разам нашу Сеч-Майдан не возьме нават цяжкая янычарская тэхніка. Даверу да зэка ніякага няма. Людзі рыхтуюцца сур'ёзна», - пішуць актывісты ў сацсетках.
Нагадаем, сёння ўночы байцы «Беркута» паспрабавалі ўзяць штурмам будынак Кіеўскай гарадской дзяржаўнай адміністрацыі на Хрышчаціку і зачысціць Еўрамайдан, аднак пасля зладжанага жорсткага супраціву мусілі адступіць.
Раніцай сілавікі прыпынілі наступ на пазіцыі апазіцыйных актывістаў. Камунальнікі ўвесь дзень доўжылі разбор барыкад на «зачышчаных» тэрыторыях, аднак далей у бок еўраактывістаў прасунуцца не змаглі, адзначаюць назіральнікі. На сцэне, усталяванай на плошчы, аднавіўся мітынг, падчас якога лідэры ўкраінскай апазіцыі заклікалі міліцыю не падпарадкоўвацца незаконным загадам і не ўжываць гвалт да дэманстрантаў.