Кіпр адмовіўся ўводзіць падаткі на дэпазіты

Улады Кіпра канчаткова адмовіліся ад ідэі ўвесці аднаразовы збор з рахункаў у мясцовых банках.

Такі збор не будзе ўведзены пры любым варыянце атрымання дапамогі ад міжнародных крэдытораў, піша Lenta.ru.

На Кіпры завяршылася пасяджэнне ўрада, прысвечанае выхаду краіны з крызісу. Як перадаюць дзелавыя СМІ, лідэры парламенцкіх партый Кіпра пасля сустрэчы з прэзідэнтам краіны Нікасам Анастасіадзісам пагадзіліся стварыць спецыяльны фонд (Solidarity Fund) у якасці гарантый для атрымання фінансавай дапамогі.

Інфармацыю аб стварэнні спецфонду пазней пацвердзіў спікер кіпрскага ўрада Крыстос Сціліанідзес (Christos Stylianides), перадае AFP. Прадстаўнік кіруючай партыі Кіпра Disy Авероф Неафіту (Averof Neophytou) растлумачыў, што фонд будзе створаны на аснове дзяржактываў, а яго сродкі пойдуць на выпуск дзяржаблігацый.

Падрабязнасці новага плана кіпрскіх уладаў па вывадзе краіны з крызісу яшчэ невядомыя. Увядзенне збору з дэпазітаў на Кіпры з'яўлялася адной з ключавых умоў атрымання Нікасіяй 10-мільярднага антыкрызіснага крэдыту ад ЕЗ, аднак кіпрскі парламент 19 сакавіка прагаласаваў супраць «банкаўскага падатку». У сваю чаргу, Еўрапейскі ЦБ паабяцаў, што пасля 25 сакавіка спыніць фінансаваць кіпрскія банкі, калі да гэтага тэрміну ўлады астраўной дзяржавы не вызначацца з праграмай стымулявання эканомікі.

Кіпрскі збор з дэпазітаў быў раскрытыкаваны за мяжой, у тым ліку ў Расеі і Велікабрытаніі, а на самім Кіпры выклікаў паніку сярод насельніцтва, якое пачало адчуваць недахоп наяўных. Кіпрскія банкі зачыненыя з пачатку гэтага тыдня, так як улады асцерагаюцца масавага адтоку сродкаў з рахункаў. Чакаецца, што фінансавыя арганізацыі не адновяць працу да 25-26 сакавіка.