5 пытанняў Лукашэнку

Напярэдадні сходу выбаршчыкаў былы палітвязень Мікалай Статкевіч апублікаваў пяць пытанняў беларускаму дыктатару.

Пытанні былі апублікаваныя ў «Фэйсбуку» палітыка.

Прыводзім тэкст цалкам:

«23 верасня а 18.00 на пл. Свабоды ў Менску я арганізую сход выбаршчыкаў. Прапаную вам узяць удзел у гэтым сходзе і адказаць на пытанні спецыяльна не падабраных, у адрозненне ад іншых вашых сустрэч, грамадзян Беларусі.

У мяне таксама ёсць пытанні - задаю іх вам папярэдне. Так як вы вольна не валодаеце мовай нашага народа, задаю іх на рускай мове.

Пытанне 1-е

Згодна з Канстытуцыяй, прэзідэнт Беларусі абіраецца на тэрмін 5 гадоў. Вы, будучы абраным у прэзідэнты ў ліпені 1994 года, наступныя "выбары" арганізавалі сабе ўжо ў верасні 2001 года. Пры гэтым вы спасылаліся на рэферэндум лістапада 1996 г., які нібыта даў вам такое права. Але той рэферэндум, (нават не кажучы пра яго сумленнасць), згодна з пастановай Канстытуцыйнага суда быў толькі дарадчым. І яго пастановы не былі нават зацверджаныя Вярхоўным Саветам. Таму, у выпадку страты ўлады вам пагражае крымінальны пераслед паводле ч. 3 арт. 357 Крымінальнага кодэксу РБ за «...утрыманне дзяржаўнай улады неканстытуцыйным шляхам». Мінімальнае пакаранне паводле гэтага артыкула - 15 гадоў пазбаўлення волі. Максімальнае - смяротнае пакаранне.

Скажыце, вы ператварылі выбары ў нашай краіне ў бессэнсоўны фарс і нейтралізуеце сваіх апанентаў любымі сродкамі, каб захаваць сваю ўладу і пазбегнуць гэтага пакарання?

Вы збіраецеся ўтрымліваць уладу да сваёй смерці?

Пытанне 2-е

У 1999-м годзе былі выкрадзеныя і забітыя шэраг дэмакратычных палітыкаў. У іх ліку - былы міністр МУС Юрый Захаранка і старшыня Цэнтральнай выбарчай камісіі Віктар Ганчар. Гэтыя злачынствы ўчынілі вайскоўцы брыгады спецназа МУС. Паводле наяўнай у мяне інфармацыі, яны былі ўпэўненыя, што выконваюць законную судовую пастанову, так як ім быў прад'яўлены «прысуд вярхоўнага сакрэтнага трыбунала», зацверджаны пячаткай прэзідэнта РБ. Таксама, паводле маёй інфармацыі, арыгінал гэтай фальшыўкі захаваны асобай, якая мае дачыненне да тых падзей.

Скажыце, вы на самай справе выкарыстоўвалі наяўную толькі ў вашым распараджэнні пячатку, каб падманам прымусіць вайскоўцаў учыніць забойства вашых канкурэнтаў?

Тады, хто для вас вашы падначаленыя - «расходны матэрыял», ад якога пасля выкарыстання лёгка пазбавіцца?

Ці згодныя вы з тым, што забойцам з'яўляецца не толькі жаўнер, які праз падман вымушаны выканаць злачынны загад аб забойстве, але і, у большай ступені, той, хто аддаў гэты загад?

Ці з'яўляецца ўся гэтая гісторыя адной з прычын, па якой вы імкняцеся любым коштам заставацца ва ўладзе, каб не несці адказнасць за тое, што адбылося?

Пытанне 3-е

Вы перашкаджаеце правядзенню эфектыўных эканамічных рэформаў, каб працягваць кантраляваць усе фінансы, кожнае прадпрыемства, кожнае працоўнае месца. Татальны кантроль дазваляе вам захоўваць сваю ўладу над краінай. Але такі «вялікі калгас», пазбаўлены свабоднай творчай ініцыятывы, пазітыўнай матывацыі менеджэраў, інжынераў, прадпрымальнікаў, не можа быць канкурэнтаздольным на сусветным рынку. Замест прыбытку ён мае страты. Гэтыя страты вы пакрываеце, выпрошваючы датацыі і крэдыты ў іншых краін. У вачах нашых суседзяў вы ператварылі Беларусь у краіну-жабрачку.

Але фінансаваць ваша жаданне кантраляваць усю нашу эканоміку гатовая толькі Расея, штогадовыя датацыі якой параўнальныя з нашым дзяржаўным бюджэтам. Робіць яна гэта для таго, каб у будучыні ўключыць Беларусь у свой склад. Бо толькі ўвядзенне сусветных коштаў на расейскія газ і нафту здольнае абрынуць арганізаваную вамі эканоміку за месяц.

У другой палове 90-х гадоў вы ўжо спрабавалі змяніць сваёй прэзідэнцкай прысягі і абмяняць нашу незалежнасць на вышэйшую пасаду ў Крамлі. Тады дзесяткі тысяч беларусаў выходзілі на вуліцы, каб спыніць вашу здраду.

Скажыце, цяпер вы таксама гатовыя ахвяраваць нашай дзяржаўнасцю, каб на некалькі лішніх гадоў застацца ва ўладзе?

Пытанне 4-е

Дыктатура - гэта бяда для краіны.

Адсутнасць палітычных свабод дазваляе ўладзе ігнараваць інтарэсы грамадства. Шараговы чалавек безабаронны перад уладай, якую ён не можа змяніць на сумленных выбарах. Улада можа знішчыць любога з дапамогай сваіх шматлікіх сілавых структур. У грамадстве пануе страх. Нездарма госці са свабодных краін адзначаюць усеагульную прыгнечанасць беларусаў.

Адсутнасць эканамічных свабод абцяжарвае не толькі развіццё эканомікі, але і прафесійную самарэалізацыю грамадзян. Звычайныя людзі не могуць сумленнай працай зарабіць на годнае жыццё сабе і сваім сем'ям. У выніку, самыя актыўныя і энэргічныя, якія маглі б быць «маторам» для нашай эканомікі, працуюць на іншыя краіны. Кожны пяты працаздольны беларус - «гастарбайтэр».

Беларусы співаюцца. Мы - сярод сусветных лідараў па ўзроўні спажывання алкаголю і самагубстваў.

За час вашага кіравання працягласць жыцця беларусаў практычна не павялічылася, у той час як у суседняй Польшчы яна вырасла амаль на 10 гадоў.

Колькасць насельніцтва нашай краіны за час вашага кіраўніцтва паменшылася амаль на мільён. Праўда, цяпер вы плануеце паправіць дэмаграфічную сітуацыю за кошт кітайцаў. Напэўна, кіраваць імі будзе зручней.

Вы разумееце, што вы з вашай балючай прагай улады - вялікае няшчасце для нашага народа?

Пытанне 5-е

Я ведаю многіх патрыётаў Беларусі - прадстаўнікоў іншых нацый. Некаторыя з іх ўнеслі вялікі ўклад у развіццё беларускай культуры і нацыі. Напрыклад, ураджэнец расейскага Свярдлоўска музыкант Уладзімір Мулявін для мяне - вялікі беларус.

Але ёсць і супрацьлеглыя прыклады. За 20 гадоў сваёй улады над Беларуссю вы зрабілі ўсё, каб наша нацыя страціла сваю старажытную і выдатную мову, нічога не ведала пра нашу слаўную гісторыю, каб беларусы ператварыліся ў "рускіх са знакам якасці», як вы любіце казаць. Вы нават забаранілі наш 700-гадовы герб і сцяг яго колераў.

Беларуская мова знікла з дзяржаўных устаноў і ВНУ, колькасць школьнікаў, якія навучаліся на ёй, зменшылася ў дзесяткі разоў. Міліцыя арыштоўвала людзей, якія святкавалі слаўныя даты нашай гісторыі, або нават проста размаўлялі па-беларуску на вуліцы.

Вы так ненавідзіце ўсё беларускае і нас, беларусаў, таму, што вы - не беларус?

Вы русіфікавалі беларусаў, каб яны менш супраціўляліся здачы незалежнасці нашай краіны Расеі?

Прапаную вам адказаць на мае пытанні. Адсутнасць адказаў ці ж рэпрэсіі супраць выбаршчыкаў, якія збяруцца 23-га верасня а 18.00 на плошчы Свабоды, каб выслухаць іх, будзе раўназначная вашым станоўчым адказам на кожнае з маіх пытанняў».