11 жнiўня 2022, Чацвер, 14:01
Сім сім, Хартыя 97!
Рубрыкі

Дэкрэт аб «дармаедстве»: Як пакінуць падатковую з носам

100
Дэкрэт аб «дармаедстве»: Як пакінуць падатковую з носам

Незалежныя прафзвязы распрацавалі падрабязную інструкцыю, як змагацца з «лістамі шчасця» ад падаткавікоў.

Прафзвязныя юрысты і праваабаронцы распрацавалі падрабязную інструкцыю і выказалі гатоўнасць надаць бязвыплатную прававую дапамогу ўсім, хто ўважае падатак «на дармаедства» несправядлівым. Яны таксама патлумачылі, чаму дэкрэт з'яўляецца незаконным і не падлягае выкарыстанню, піша сайт praca-by.info.

Нагадаем, 1 лістапада лідары і юрысты прафзвязаў РЭП і БНП разам з прадстаўнікамі праваабарончых арганізацый сабраліся ў офісе прафзвязу РЭП і выпрацавалі план процідзеяння несправядліваму дэкрэту. Адным з пунктаў плана была распрацоўка пакрокавай інструкцыі аб тым, як законнымі спосабамі сысці ад выканання дэкрэта №3, названага ў народзе дэкрэтам «аб дармаедстве».

Выконваючы гэты план, старшыня юрыдычнай камісіі БХК Гары Паганяйла зрабіў падрабязны прававы аналіз, які даказвае незаконнасць дэкрэта №3. Узброіўшыся гэтым дакументам кожны «дармаед» можа смела адпраўляцца ў суд.

Асноўныя тэзы дакумента (для атрымання падрабязнай інфармацыі перайдзіце па спасылцы):

1. Перадгісторыя пытання

Дэкрэтам Лукашэнкі ад 2 красавіка 2015 года №3 «Аб папярэджанні сацыяльнага ўтрыманства» ўведзены новы рэспубліканскі збор на фінансаванне дзяржаўных выдаткаў.

2. Што трэба ведаць, каб разумець прававую сутнасць дэкрэта

Дэкрэтам уводзіцца новая выплата, спагнанне якой распаўсюджваецца на працаздольных, але непрацоўных (або «недастаткова працоўных», менш за 183 каляндарныя дні) грамадзян.

Нявыплата або няпоўная выплата збору цягнуць накладанне штрафу сумай ад двух да чатырох базавых адзінак або адміністрацыйны арышт. Грамадзянін, які адбыў пакаранне, прызнаецца выканаўшым абавязак выплаты збору (п.14).

3. Чаму дэкрэт з'яўляецца незаконным, супярэчыць Канстытуцыі, міжнародным дамовам Рэспублікі Беларусь, парушае правы грамадзян і не падлягае выкарыстанню

3.1 Дэкрэт «аб дармаедах» уводзіць новую форму прымусовай працы, што супярэчыць Канстытуцыі і міжнародным абавязанням краіны.

Замест забеспячэння права на свабодную працу нормамі дэкрэта ўстаноўлены прававы механізм прымусовай працы пад пагрозай пакарання.

3.2 Дэкрэт «аб дармаедах» маніпулюе тэрмінамі, скрыўляе сапраўднае становішча і падманвае грамадзян аб іх няўдзеле ў фінансаванні дзяржаўных выдаткаў.

Калі развеяць папулісцкі туман, што напускаецца афіцыйнымі ўладамі ў тэксце Дэкрэта, то ў «сухім астатку» бачыцца толькі жаданне дзяржавы прымусіць працаваць тых, хто не працуе, або адкупіцца шляхам выплаты збору, каб папоўніць бюджэт.

3.3 Дэкрэтам «аб дармаедах» уводзіцца новая логіка збораў: не за здзяйсненне пэўных канкрэтных дзеянняў дзяржавы для чалавека, а толькі за тое, што чалавек знаходзіцца на тэрыторыі дзяржавы больш за 183 дні і гіпатэтычна можа атрымліваць некаторыя выгоды бязвыплатна.

3.4 Патрабаванне дэкрэта «аб дармаедах» замахваецца на магчымасць выканання канстытуцыйных абавязкаў бацькоў для выхавання дзяцей, а дарослых дзяцей – для клопату пра сваіх састарэлых бацькоў, якія маюць патрэбу ў дапамозе.

3.5 Дэкрэт «аб дармаедах» замахваецца на асабістую годнасць, недатыкальнасць прыватнага жыцця.

Кожны, хто абавязваецца да выплаты збору за дармаедства, мае права сцвярджаць, што дзяржава парушыла гарантаваны прыярытэт ягоных правоў і свабод (артыкулы 2, 22 Канстытуцыі), прынізіла ягоны гонар і годнасць, выставіўшы незаконныя і неабгрунтаваныя патрабаванні.

3.6 Лукашэнка выдаў дэкрэт з перавышэннем сваіх паўнамоцтваў.

Атрымаўшы прававыя веды, вы можаце пераходзіць да практычных дзеянняў для абароны сваіх правоў, сцвярджаюць юрысты.

Такім чынам, што рабіць, калі вы атрымалі ліст з падатковай інспекцыі?

Юрыст прафзвязу РЭП Юры Белякоў распавёў, якія дзеянні могуць зрабіць грамадзян, атрымаўшы апавяшчэнне аб няўдзеле ў фінансаванні дзяржаўных выдаткаў або паведамленне на выплату збору на фінансаванне дзяржаўных выдаткаў:

– Вы атрымалі з інспекцыі МПЗ так званы «ліст шчасця» – апавяшчэнне аб няўдзеле ў фінансаванні дзяржаўных выдаткаў. Апавяшчэнне можна спакойна праігнараваць, гэта не нясе ніякіх юрыдычных наступстваў.

Іншая справа, калі прыйдзе паведамленне. У гэтым выпадку вы можаце падаць скаргу ў электронным або ў пісьмовым выглядзе на імя кіраўніка інспекцыі або асобы, якая падпісала апавяшчэнне. (Узор скаргі ў падатковую інспекцыю).

Цягам месяца вы павінны атрымаць адказ з растлумачэннем парадку і тэрмінаў яго абскарджання. Калі адказ вас не задаволіў, вы маеце права звярнуцца са скаргай у вышэйстаячую падатковую інспекцыю (абласную, Менскую гарадскую), затым (месячны тэрмін з дня атрымання адказу) у суд у парадку Закона «Аб зваротах грамадзян і юрыдычных асоб» (арт 20) і ў адпаведнасці з артыкуламі 353-357 ГПК Рэспублікі Беларусь – скарга на дзеянні (бяздзейнасць) дзяржаўных органаў і службовых асоб, якія ўціскаюць правы грамадзян (Узор скаргі ў суд).

Абскарджанне дзеянняў ІМПЗ у судовым парадку запатрабуе аплаты дзяржаўнай мыты на суму адная базавая адзінка.

Прафзвязны юрыст пералічыў выпадкі, пры якіх грамадзянін не падпадае пад дзеянне дэкрэта №3:

– Вы можаце зарэгістравацца як беспрацоўны ў цэнтры занятасці на месцы жыхарства; можаце ўзяць даведку ў сельсавеце, што ў вас ёсць асабістае прысядзібная гаспадарка; можаце зарэгістравацца ў сваім выканкаме ў аддзеле «адно акно» як рамеснік; можаце аформіць апякунства (догляд за дзіцем да 7 гадоў), альбо за трыма непаўналетнімі; можаце паступіць на дзённую форму навучання ва ўсялякую ўстанову адукацыі. І нарэшце, вы можаце сысці ў манастыр. Манахі ў нашай краіне за дармаедаў не ўважаюцца. Як кажуць праваабаронцы, мы далі вам вуду, навучыцца лавіць рыбу – ваша клопат! – падрахаваў Юрый Белякоў.