З’явіліся новыя рэйтынгі дэмакратаў і рэспубліканцаў перад выбарамі ў Кангрэс ЗША

Прамежкавыя выбары пачнуцца ўжо праз два дні.

На 1 лістапада 2026 года, за двое сутак да выбараў у Кангрэс ЗША, дэмакраты — відавочныя фаварыты ў барацьбе за Палату прадстаўнікоў. У Сенаце яны таксама маюць перавагу, але невялікую. Цяпер абедзве палаты кантралююць рэспубліканцы.

Галоўная інтрыга 3 лістапада — ці зможа партыя Дональда Трампа захаваць хаця б Сенат.

Палата прадстаўнікоў. Для большасці патрэбныя 218 месцаў з 435. Паводле зводнай ацэнкі The Wall Street Journal, заснаванай на рэйтынгах трох аналітычных цэнтраў, дэмакраты могуць атрымаць 224 месцы. Inside Elections чакае большы зрух — прырост на 20–30 месцаў для дэмакратаў.

Важная і дынаміка апошніх дзён. 30 кастрычніка Cook Political Report перагледзеў ацэнку яшчэ 12 акругаў на карысць дэмакратаў. Аналітыкі разыходзяцца перадусім у тым, наколькі вялікай будзе іхняя большасць.

Сенат. У рэспубліканцаў 53 месцы, у дэмакратаў разам з незалежнымі сенатарамі, якія прымыкаюць да іх, — 47. Пры ліку 50 на 50 вырашальны голас належыць віцэ-прэзідэнту Джэю Дзі Вэнсу, таму дэмакратам патрэбны чысты прырост на чатыры месцы. Inside Elections прагназуе ім прыраст на 4–6 месцаў. Cook Political Report больш асцярожны і называе дэмакратаў толькі невялікімі фаварытамі.

Дзе вырашыцца лёс Сената. У сямі штатах Cook не бачыць відавочнага фаварыта. Арыфметыка простая. Калі дэмакраты возьмуць Паўночную Караліну і ўтрымаюць усе свае месцы, уключаючы Мічыган, ім застанецца заваяваць яшчэ тры рэспубліканскія мандаты.

У апытанні Reuters/Ipsos 22–26 кастрычніка дэмакраты апярэджвалі рэспубліканцаў на 9 працэнтных пунктаў сярод верагодных выбарцаў, калі ў тых пыталіся, кандыдата якой партыі яны падтрымаюць у Палату прадстаўнікоў. Сярэдняе некалькіх апытанняў у Silver Bulletin на 30 кастрычніка давала амаль тую ж лічбу — 8,9 пункта, крыху ніжэй за нядаўні пік у 9,2.

То-бок да фіналу кампаніі дэмакраты захоўваюць шырокую агульнанацыянальную перавагу, хоць у апошнія дні яна амаль не змянялася. Для Сената гэты паказчык менш паказальны, бо некалькі вырашальных гонак праходзяць у штатах, дзе Трамп перамагаў з вялікім адрывам.

Што стаіць за перавагай дэмакратаў. Адна з галоўных тэм кампаніі — кошт жыцця. У кастрычніцкім апытанні ABC News / The Washington Post / Ipsos па гэтым пытанні дэмакратам больш давяралі 38% амерыканцаў, рэспубліканцам — 24%. Ёсць і палітычны матыў.

У тым жа апытанні 59% аддалі б перавагу Кангрэсу пад кантролем дэмакратаў, каб ён служыў процівагай Трампу, а 35% — рэспубліканскай большасці дзеля падтрымкі яго курса. Менавіта пераход Палаты прадстаўнікоў да апазіцыі цяпер выглядае найбольш верагодным змяненнем па выніках выбараў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com