Бацькі менскіх школьнікаў узбунтаваліся супраць расейскай папсы
19- 2.05.2017, 18:04
- 17,209
Класны кіраўнік прымушае выпускнікоў купіць квіткі на канцэрт Ягора Крыда.
Вучні 9 класа і іхныя бацькі абурыліся, калі класны кіраўнік папрасіў здаць па 25-35 рублёў на выступ Ягора Крыда і гурта «MBAND». Ва ўправе адукацыі адказалі: гэта проста рэкамендацыя.
- Днямі ў агульную групу ў Viber класны кіраўнік напісаў, што ўсім цэнтралізавана трэба купіць квіткі на канцэрт нейкага Крыда. Гэты загад дала ўправа адукацыі і на канцэрт дзеці пойдуць замест экскурсіі, - распавядае tut.by маці вучня 9 класа сталічнай гімназіі Савецкага раёна. - У групе пачалося гарачае абмеркаванне. Па-першае, дзеці самі не хочуць ісці на Крыда, ён многім наогул не падабаецца. Па-другое, чаму мы павінны спансаваць расейскі шоў-бізнэс?
Бацькі надумалі не здаваць ніякіх грошай і звярнуліся ў рэдакцыю парталу.
30 траўня ў «Мінск-Арэне» адбудзецца канцэрт «Апошні званок 2017». «Свае найлепшыя гіты выканаюць самыя папулярныя артысты новага пакалення - Ягор Крыд і гурт «MBAND», - гаворыцца ў афішы. Частка квіткоў не распрададзеная.
- Распараджэнне ніякага не было, гэта няпраўда. Проста разглядаецца новы фармат правядзення апошняга званка. Так, запрашаюцца вучні на «Мінск-Арэну», але гэта ўсё на добраахвотных пачатках. Калі нашыя дзеці зацікаўлены будуць, то, вядома, яны туды пойдуць. Калі не - ім будуць прапанаваныя іншыя формы: ці экскурсіі, ці дыскатэка ва ўстанове адукацыі, - каментуе Інэса Сабаленка, начальніца ўправы адукацыі, спорту і турызму Савецкага раёна.
- Інэса Мікалаеўна, калі дзеці не хочуць ісці на гэты канцэрт, яны маюць права адмовіцца?
- Вядома, ніхто не можа прымусіць дзіця або аднаго з бацькоў купіць білет на канцэрт без ягонага жадання.
Ва ўправе адукацыі Савецкага раёна адзначылі, што квіткі на «Апошні званок 2017» яшчэ ніхто не купляў, пакуль ідзе «тлумачальная праца».