Берасцейскі актывіст: Прыпыненне завода яшчэ не азначае, што патрабаванні людзей задаволеныя

Улады Берасця пасля пратэстаў прыпынілі будаўніцтва акумулятарнага завода.

Праз паўтара года пасля пачатку пратэстаў супраць стварэння ў Берасці акумулятарнага завода, гарадскія ўлады прыпынілі яго будаўніцтва. У распараджэнні, якое ў пятніцу, 14 чэрвеня, падпісаў старшыня Берасцейскага аблвыканкама Анатоль Ліс, паказваецца, што будаўніцтва прыпыненае аж «да ліквідацыі выяўленых парушэнняў», піша «Немецкая волна».

Пра якія менавіта парушэнні ідзе гаворка, у распараджэнні не згадваецца, аднак за два дні дагэтуль - упершыню за паўтара года пратэстаў - кіраўнік рэгіёну сустрэўся з апанентамі завода. Журналістаў на сустрэчу не пусцілі, але са слоў прадстаўнікоў ініцыятыўнай групы, Анатоль Ліс быў уражаны фактамі парушэння экалагічных нормаў пры будаўніцтве, пра якія стала вядома актывістам.

Паводле вынікаў трохгадзіннай гутаркі старшыня Берасцейскага аблвыканкама даручыў вывучыць довады і пададзеныя дакументы. У выпадку калі выкладзеныя факты, якія тычацца парушэнняў заканадаўства, пацвердзяцца, кіраўнік рэгіёну не выключыў, што запуск завода ў эксплуатацыю можа не адбыцца.

Супрацьстаянне даўжынёй у паўтара года

Акумулятарны завод на прамысловай пляцоўцы «Аэрапорт» у свабоднай эканамічнай зоне «Берасце» будуе прадпрыемства ТАА «АйПаўэр». Згодна з планамі інвестара, на заводзе будзе наладжаны поўны цыкл вытворчасці свінцова-кіслотных акумулятарных батарэй.

Першапачаткова ў дакументах дзяржаўнай экалагічнай экспэртызы прагназавалася, што негатыўнае ўздзеянне гэтага прадпрыемства на навакольнае асяроддзе будзе нязначнае. Аднак мясцовыя жыхары асцерагаюцца, што шкодныя выкіды з заводу негатыўна адаб'юцца на іх здароўі. Да таго ж прадпрыемства размешчанае недалёка ад папулярных месцаў адпачынку берасцейцаў і дачных пасёлкаў.

Пратэсты, звязаныя са з'яўленнем акумулятарнага завода, пачаліся ў Берасці ў пачатку 2018 года, калі людзі ўпершыню даведаліся пра падрыхтоўку будаўніцтва. Праціўнікі завода мяркуюць, што пры прыняцці рашэння былі парушаныя працэдуры, якія павінны папярэднічаць узвядзенню прамысловага аб'екта.

Ужо амаль паўтара года неабыякавыя берасцейцы і жыхары найбліжэйшых вёсак выкарыстоўваюць у якасці месца правядзення сваіх акцый пратэсту цэнтральную плошчу горада, куды яны прыходзяць кожную нядзелю нібыта «пакарміць галубоў». У апошнія месяцы сустрэчы на плошчы трансфармаваліся ў стыхійныя шэсці па вуліцах Берасця.

Некаторыя з гэтых шэсцяў завяршаюцца затрыманнямі актывістаў, пасля чаго ў судзе ім выносяцца штрафы за «парушэнне парадку правядзення масавых мерапрыемстваў». Пры гэтым легальна правесці мітынг супраць будаўніцтва завода берасцейскія ўлады дазволілі толькі аднойчы - у красавіку 2018 года.

Мэта пратэсту - зачыніць завод

Распараджэнне аб прыпыненні будаўнічых работ праціўнікі гэтай будоўлі ўспрынялі стрымана, бо пакуль няма ўпэўненасці, што ўлады прынцыпова і паслядоўна паставяцца да тых праблем, якія ўжо вядомыя.

«Прыпыненне яшчэ не азначае, што патрабаванні людзей задаволеныя: бо пакуль гаворка ідзе аб ліквідацыі выяўленых парушэнняў», - адзначае актыўны ўдзельнік пратэстаў Аляксандр Кабанаў. На яго думку, ліквідаваць усе парушэнні нерэальна і завод не зможа працаваць згодна з правіламі. А таму адзіным выхадам з сітуацыі можа быць толькі закрыццё гэтага прадпрыемства. Пакуль гэтага не здарыцца, актывісты гатовыя працягваць пратэстныя акцыі.

У прэс-службе групы кампаній 1AK-Group (у яе ўваходзіць ўладальнік завода - ТАА «АйПаўэр») на просьбу пракаментаваць распараджэнне старшыні Берасцейскага аблвыканкама аб прыпыненні будаўніцтва аб'екта заявілі, што пакуль не маюць інфармацыі аб прычынах з'яўлення гэтага распараджэння.

«Атрымаўшы адмоўнае заключэнне дзяржаўнай экалагічнай экспертызы, ТАА «АйПаўэр» ініцыюе правядзенне паўторнай экспертызы, пасля чаго будзе адноўлена працэдура ўводу аб'екта будаўніцтва ў эксплуатацыю», - заявілі ў прэс-службе.