Зяленскі правёў сустрэчу з сем'ямі ваеннапалонных маракоў

Прэзідэнт Украіны спадзяецца, што найбліжэйшым часам маракі будуць вызваленыя.

Прэзідэнт Украіны Уладзімір Зяленскі сустрэўся з сем'ямі ўкраінскіх маракоў, якія былі захопленыя расейскімі вайскоўцамі ў Чорным моры, паведаміла 14 чэрвеня прэс-служба прэзідэнта Украіны.

Са слоў кіраўніка дзяржавы, ён трымае сітуацыю на кантролі. Зяленскі таксама нагадаў пра пастанову Міжнароднага трыбунала ААН у марскім праве з патрабаваннем вызваліць украінцаў.

«Мы ўпэўненыя, што тыя крокі, якія мы зараз робім, у найбліжэйшым часе дадуць нам магчымасць вярнуць маракоў», - адзначыў прэзідэнт.

Падчас сустрэчы ўздымалася пытанне падтрымкі сем'яў маракоў, у тым ліку забеспячэння іх жыллём. Таксама гаварылася пра законапраект, які прадугледжвае надаванне ваеннапалонным статусу ўдзельнікаў баявых дзеянняў. Са слоў Зяленскага, праз недзеяздольнасць дзейнай Вярхоўнай Рады прыняць дакумент пакуль няма магчымасці, але народныя дэпутаты новага склікання разгледзяць адпаведны законапраект.

25 лістапада 2018 года РФ абстраляла і захапіла ў Чорным моры катары ўкраінскіх Вайскова-марскіх сіл «Бярдзянск» і «Нікапаль», а таксама буксір «Яны Капу», якія вярталіся ў Адэсу пасля спробы прайсці праз Керчанскі праліў у Азоўскае мора.

Расейскія сілавікі затрымалі 24 украінскіх маракоў, пазней іх арыштавалі ў крымскіх «суднах» і перавезлі ў Маскву. Траіх параненых украінцаў змясцілі ў бальніцу следчага ізалятара «Матроская цішыня», астатніх даставілі ў СІЗА «Лефортава». Цяпер усе маракі знаходзяцца ў «Лефортава».

Усім украінцам выставілі абвінавачванні ў незаконным перасячэнні мяжы РФ. Украіна ўважае маракоў ваеннапалоннымі і патрабуе адпусціць іх. Ва ўпраўленні вярхоўнага камісара ААН правоў чалавека заявілі, што ўкраінскія маракі, як ваеннапалонныя, павінны знаходзіцца пад абаронай Жэнеўскай канвенцыі.

Украіна звярнулася ў Міжнародны трыбунал марскога права, запатрабаваўшы ў якасці часовых мер абавязаць РФ неадкладна вызваліць маракоў і караблі.

Расейскі бок адмовіўся ад удзелу ў слуханнях.

25 траўня трыбунал у Гамбургу абавязаў Расею неадкладна вызваліць тры затрыманыя ўкраінскія караблі, а таксама 24 затрыманых маракоў і дазволіць ім вярнуцца ва Украіну. Рашэнне было прынятае 19 галасамі, супраць выступіў толькі суддзя ад РФ Раман Калодкін.

У міністэрстве замежных спраў Расеі мяркуюць, што міжнародны арбітраж не меў юрысдыкцыі для разгляду інцыдэнту.