Што зараз адбываецца на памежнай тэрыторыі Беларусі з Украінай?

Мінабароны Беларусі працягвае "вучэнні" розных тыпаў войскаў.

Міністэрства абароны Беларусі не спыняе праводзіць "вучэнні" розных відаў войскаў, працягвае ўзмоцненую ахову беларуска-ўкраінскай мяжы, працягваецца выкарыстанне вайсковых палігонаў. “Флагшток” расказвае, што зараз адбываецца на памежнай тэрыторыі.

Актыўнасць вайскоўцаў у Гомельскай вобласці на сённяшні дзень не мае масавага характару. Мабілізацыйныя вучэнні ў Гомельскай вобласці і вучэнні тэрытарыяльнай абароны ў Жлобінскім раёне закончаныя. За 7 кіламетраў ад мяжы Украіны ў Нараўлянскім раёне на стрэльбішчы «Добрынь» працягваюцца палявыя стрэлы памежных войскаў.

Паводле інфармацыі мясцовых жыхароў, у мінулыя тыдні ў раёне Зябраўкі працягвалі фіксавацца адзінкавыя экзэмпляры расейскай і беларускай вайсковай тэхнікі. Выкарыстанне гомельскага аэрадрома не фіксавалася.

У той жа час месцам вайсковай актыўнасці становіцца Заходняе Палессе. Паводле інфармацыі тэлеграм-каналаў, у апошнія два дні на тэрыторыі Берасцейскай вобласці і заходняй частцы Гомельскай фіксуюцца перамяшчэнні вайсковай тэхнікі. Некаторыя калоны дасягаюць колькасці 2-3 дзясяткаў адзінак.

Журналісты паразмаўлялі з жыхаром Палесся, які назірае за вайсковымі перамяшчэннямі. На ўмовах ананімнасці ён падзяліўся сваім меркаваннем аб тым, што адбываецца на мяжы:

“Занадта мала інфармацыі пакуль што, асабліва аб перамяшчэннях вайсковай тэхнікі ў раёнах Берасцейскай вобласці, якія мяжуюць з Украінай. Напрыклад, тое, што прывезлі ў Ельск учора — гэта можна спісаць на ратацыю. Тое, што адбываецца зараз там (Янаўскі, Драгічынскі і іншыя раёны), сказаць складана.

Але з таго, як гэта ўсё асвятляюць у раённых газетах - даволі падрабязна, складваецца ўражанне, што спрабуюць усімі сіламі старацца прыцягнуць увагу Украіны да сваіх дзеянняў. Бо раней людзі даведаліся аб вайсковай тэхніцы ў іх памежным горадзе постфактум, а зараз чамусьці сталі папярэджваць загадзя.

У кожным выпадку, з той інфармацыі, што ёсць, можна зрабіць выснову - гэтай колькасці салдат і вайсковай тэхнікі ўсё яшчэ недастаткова для нейкіх актыўных дзеянняў, акрамя як паказваць "узмацненне" мяжы”.