Папу рымскага навучылі віруснаму мему «six-seven»

Што вядома пра гэты трэнд.

Папа рымскі Леў XIV паўтарыў вірусны маладзёжны мем «six-seven». Дзеці падлавілі пантыфіка ў Ватыкане, паказалі рухі рукамі і прапанавалі зрабіць тое самае. Судзячы з рэакцыі папы, ён не зразумеў, што гэта за новы трэнд. Выданне «Гордон» сабрала інфармацыю пра тое, што азначае «six-seven» і чаму трэнд стаў папулярным.

Відэа з пантыфікам апублікаваў у TikTok італьянскі святар Дон Раберта Фішэр.

Менш чым за суткі ролік сабраў больш за 10 млн праглядаў і тысячы каментароў.

Фішэр таксама ёсць на відэа — ён разам з падлеткамі паказвае папу рымскаму той самы вірусны трэнд «six-seven». Судзячы з рэакцыі папы, ён застаўся ў захапленні.

Мем з'явіўся пасля відэа гульца НБА ЛаМэла Болла, чый рост складае шэсць футаў сем цаляў. У ім прагучаў радок «six, seven» з трэка філадэльфійскага рэпера Skrilla.

Значэнне фразы ў трэку дакладна невядома: некаторыя звязваюць яе з 67-й вуліцай у Філадэльфіі (родным горадзе Skrilla) або 67-й вуліцай у Чыкага. Мовазнавец і даследчык афраамерыканскай англійскай Тэйлар Джонс мяркуе, што ідзе гаворка пра паліцэйскі код «10-67», які абазначае смерць.

Мем «выбухнуў» у маладзёвай культуры пасля відэа, дзе падлетак Мэверык Трэвілян выкрыквае «six-seven» на баскетбольным матчы.

Фраза стала настолькі папулярнай у маладзёвым слэнгу і сацсетках, што Dictionary.com прызнаў яе словам 2025 года.

Некаторыя настаўнікі ў ЗША выказалі ў сацсетках свой непакой з-за таго, што гэтая фраза можа зрываць урокі, а некаторыя сцвярджаюць, што наогул забаранілі яе ў сваіх класах, пісаў Axios.

Цяпер настаўнікі стараюцца не дзяліць дзяцей на групы па шэсць або сем, не просяць адкрыць старонку 67 і не даюць заданні на шэсць або сем хвілін, адзначае канал.

Увосень 2025 года мем з'явіўся ў эпізодзе 28-га сезона мультсерыяла South Park пад назвай Twisted Christian. Там школьнікі выкрыквалі «six-seven» на ўроках і зрывалі заняткі ў школе.

У Расіі кіраўнік грамадскага руху «Расія праваслаўная» Міхаіл Іванаў заклікаў забараніць гэты трэнд. У інтэрв'ю расійскаму выданню Іванаў заявіў, што дзеці ў Расіі «страчваюць кантроль над сваім паводзінамі, зрываюцца ўрокі, настаўнікі не могуць працаваць, а падлеткі ўпадаюць у агрэсію і істэрыкі». Ён заклікаў Федэральную службу па наглядзе ў сферы сувязі, інфармацыйных тэхналогій і масавых камунікацый РФ блакаваць такія чэленджы і трэнды.

Мовазнавец і сацыёлаг Тэйлар Джонс лічыць, што «six-seven» выконвае важную сацыяльную функцыю, піша CNN. Паводле яго слоў, мем дапамагае падлеткам адчуць прыналежнасць да пэўнай групы і адасобіцца ад дарослых.

Таксама занепакоеных бацькоў і настаўнікаў супакойвае прафесар камунікацый Цынцынацкага ўніверсітэта Гейл Ферхерст, якая даследуе маладзёвы слэнг. Яна кажа, што такія бессэнсоўныя фразы па сваёй сутнасці не шкодныя.

Псіхолаг Сэм Гольдштэйн у Psychology Today патлумачыў, што бацькам не варта ўспрымаць такія тэндэнцыі як прыкмету павярхоўнасці або праблем з канцэнтрацыяй у дзіцяці.

«Дзіцячы гумар змяніўся. Яны любяць жарты, якія насамрэч не маюць сэнсу, але ўсё роўна працуюць. Гэта можа здавацца павярхоўным, але насамрэч гэта форма ўстойлівасці. Калі свет адчуваецца няўпэўненым, навіны цяжкія, а дарослыя пастаянна сварацца, бязглуздзіца прапануе палёгку», — напісаў ён.

Псіхолаг таксама лічыць, што «six-seven», хутчэй за ўсё, знікне так жа хутка, як і з'явіўся.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com