У Курапатах зламалі 38 крыжоў

Ва ўрочышчы Курапаты пад Менскам напярэдадні 7 лістапада ўчынены чарговы акт вандалізму.

Невядомыя зламалі 38 крыжоў ва ўрочышчы Курапаты, месцы масавых палітрэпрэсіяў. Пра гэта «Радыё Свабода» паведаміў сябра КХП-БНФ Аляксандр Макаў.

Паводле яго словаў, сляды вандалізму - зламаныя ля заснавання крыжы - былі выяўленыя актывістамі партыі 6 лістапада падчас традыцыйнай талакі ў Курапатах.

Вандалы зламалі крыжы на алеі ўздоўж паўднёва-ўсходняй мяжы ўрочышча, з боку гандлёвага комплекса «Экспабел».

На месцы здарэння працуюць супрацоўнікі міліцыі.

Адказны сакратар управы КХП-БНФ Алесь Чахольскі лічыць, што акцыя вандалізму звязаная з 7 лістапада - днём кастрычніцкага перавароту.

Ён падкрэсліў, што дадзеная акцыя здзейсненая наўмысна.