Так пачыналася бязмежжа
21- 18.09.2016, 12:37
- 24,275
![Так пачыналася бязмежжа](https://i.c97.org/p/articles/2016/ai-223081-aux-head-20160919_gonczar_t.jpg)
Як здымалі Віктара Ганчара з пасады старшыні Цэнтрвыбаркама.
Прававое бязмежжа, у якое пагрузілася Беларусь, пачалося з сілавога адхілення Віктара Ганчара з пасады старшыні Цэнтрвыбаркама, піша «Беларуская праўда».
Усякая ўлада ўважаецца за легітымную, калі яна прайшла праз працэдуру адкрытасці, празрыстасці і законнасці, якую замацоўвае незалежная выбарчая камісія. Цяперашнія праблемы, з якімі сутыкаецца не толькі ўлада, але і ўсё беларускае грамадства, звязаныя з незаконным зняццем з пасады старшыні Цэнтральнай выбарчай камісіі ў выбарах Віктара Ганчара ўказам Лукашэнкі. Здарэнне адбылося 14 лістапада 1996 года.
![](https://i.c97.org/p/galleries/2016/gi-23244-116662-big.jpg)
Замест Віктара Ганчара ўказам Лукашэнкі, які перавысіў свае канстытуцыйныя паўнамоцтвы, старшынёй Цэнтрвыбаркама была прызначаная юрыстка Бабруйскага гарвыканкама Лідзія Ярмошына, на зацвярджэнне якой Вярхоўны Савет 13-га склікання не даў сваёй згоды.
![](https://i.c97.org/p/galleries/2016/gi-23244-116663-big.jpg)
Пасля незаконнага зняцця з пасады Віктар Ганчар прапанаваў стварыць спецыяльную камісію для прававой ацэнкі парушэнняў Канстытуцыі і законаў Рэспублікі Беларусь з боку Лукашэнкі. Ганчар стаў збіраць факты, юрыдычныя дакументы, паказанні сведак аб парушэннях Канстытуцыі з мэтай наступнага адхілення Лукашэнкі ад улады. Магчыма, менавіта дзейнасць на пасадзе кіраўніка камісіі пры Вярхоўным Савеце і стала для Віктара Ганчара фатальнай.
Адлік існавання нелегітымнай беларускай улады ідзе менавіта з моманту адхілення В.Ганчара ад пасады старшыні ЦВК. Ніводныя выбары ў Беларусі не прызнаныя свабоднымі і дэмакратычнымі, адпаведнымі міжнародным стандартам. Праз тры гады Віктар Ганчар быў выкрадзены, ягонае месца знаходжанне дагэтуль не ўстаноўленае. Без адказу на пытанне: дзе старшыня ЦВК Віктар Ганчар? - выбары ў краіне ніколі не будуць прызнаныя.