23 красавiка 2024, aўторак, 1:31
Падтрымайце
сайт
Сім сім,
Хартыя 97!
Рубрыкі

Лукашэнка паскардзіўся на Пуціна і Мядзведзева ў газету «Праўда»

117
Лукашэнка паскардзіўся на Пуціна і Мядзведзева ў газету «Праўда»

Беларускі дыктатар напісаў ліст на імя рэдактара расейскай газеты «Праўда» Барыса Камоцкага.

Аляксандр Лукашэнка палічыў неабходным праінфармаваць выданне «аб рэальнай сітуацыі, якая склалася па так званым газавым канфлікце» паміж Беларуссю і Расеяй. У лісце падрабязна выкладаецца прадгісторыя канфлікта і пазіцыя беларускага боку, перадае БелаПАН.

«Адразу хачу падкрэсліць, што перамоўны працэс з-за віны расейскага боку фактычна апынуўся сарваны, - адзначае Лукашэнка. - Хоць мы ўвесь час займалі гнуткую канструктыўную пазіцыю, прапаноўвалі розныя варыянты ўзаемавыгаднага вырашэння пытання, былі гатовыя да прымальных кампрамісаў. Беларускія ініцыятывы ігнаравалася, а нашых прадстаўнікоў, уключаючы чальцоў урада высокага ўзроўню, змушалі гадзінамі сядзець у газпрамаўскіх прыёмных».

«Аказваецца, што, на словах разважаючы аб недапушчальнасці перагляду ўрокаў гісторыі, расейскае кіраўніцтва на самой справе святасць брацкіх кайданоў ацэньвае ў кубаметрах газу і барэлях нафты», - падкрэсліваецца ў лісце.

«Мы абсалютна несупраць прагматычнасці ў эканамічным супрацоўніцтве, - працягвае Лукашэнка. - Але яна павінна ў роўнай ступені тычыцца абодвух бакоў, улічваць увесь спектр двухбаковых узаемаадносін і адпавядаць духу інтэграцыйных працэсаў, якія ажыццяўляюцца. І, вядома, грунтавацца на няўхільным выкананні ўсімі бакамі прынятых абавязацельстваў, без выняткаў, абмежаванняў і адвольнага тлумачэння».

«Давайце будзем шчырымі: няўжо за дзеяннямі «Газпрама» ва ўсёй гэтай гісторыі ляжыць толькі грашовы інтарэс? Хіба пара соцень мільёнаў даляраў можа быць вырашальнай для фінансавага становішча адной з найбуйнейшых транснацыянальных карпарацый? Перакананы, што для ўсіх адказ вядомы», - піша беларускі кіраўнік.

Падаплёка канфлікту, на думку Лукашэнкі, абсалютна ў іншым: «Ён толькі частка той несяброўскай палітыкі, якая на працягу апошніх гадоў планамерна праводзіцца ў дачыненні да Беларусі. Дастаткова ўзгадаць нядаўнія «малочныя», «мясныя», «цукровыя», «нафтавыя» і іншыя войны. Я ўжо не кажу пра тую мэтанакіраваную, якая праводзіцца большасцю расійскіх СМІ, лінію, якая набыла характар сапраўднай інфармацыйнай агрэсіі».

Аўтар ліста лічыць, што мэта відавочная: «ўпарадкаваць» кіраўніцтва Беларусі, прымусіць пайсці на саступкі на шкоду нацыянальным інтарэсам суверэннай дзяржавы, займець смачныя кавалкі беларускай уласнасці.

«Мы, у Беларусі, усё гэта бачым і ацэньваем адпаведным чынам. Як вынік, сярод нашых грамадзян, на жаль, становіцца ўсё менш прыхільнікаў глыбокай інтэграцыі з Расеяй. Беларусы пачынаюць ставіцца да самай блізкай для нас краіны - Расеі - з насцярогай, чакаючы ад яе самых непрадказальных удараў», - сцвярджае Лукашэнка.

Тэкст адкрытага ліста апублікаваны ў «Праўдзе», якая пасля распаду СССР з'яўляецца друкаваным органам Камуністычнай партыі Расеі, 28 чэрвеня.

Напісаць каментар 117

Таксама сачыце за акаўнтамі Charter97.org у сацыяльных сетках