18 февраля 2019, понедельник, 12:17
Спасти «Хартию»! Стать нацией!
Рубрики

Оперная спявачка Ляўчук гатова адкрываць дзверы нагой, паказваць пашпарт і крычаць: Я - беларуска!

3
Маргарыта Ляўчук

Спявачка нарадзілася ў маленькай вёсцы на Брэстчыне, а змагла скарыць оперныя сцэны не толькі Беларусі, але і замежжа.

На думку 28-гадовай опернай спявачкі Маргарыты Ляўчук, вельмі несправядліва, што Беларусь у свеце пазнаюць толькі па дасягненнях нашых спартсменаў, піша nn.by.

Опернае мастацтва Беларусі цяпер знаходзіцца на вельмі высокім узроўні, лічыць спявачка. Беларускіх салістаў запрашаюць выступаць у сусветнавядомых тэатрах, беларусы — пераможцы самых прэстыжных конкурсаў.

Салістка Вялікага тэатра Беларусі і Музычнага дома «Класіка» Маргарыта Ляўчук — гэта новае імя на опернай сцэне Беларусі, нават не імя, а з’ява. Пра яе кажуць, што яна паўтарыла лёс Папялушкі. Нарадзілася ў маленькай вёсцы на Брэстчыне, а змагла скарыць оперныя сцэны не толькі Беларусі, але і замежжа. У мінулым годзе выйграла чатыры прэстыжныя оперныя конкурсы. Як атрымалася? Кажа, што «трэба мець дзве рэчы: талент і мару».

Пагутарылі журналісты з Маргарытай па тэлефоне, пакуль яна знаходзіцца ў Харватыі, пасля яе — прэм’ера спектакля «Рамэа і Джульета» у італьянскай Равэне.

«Ганарар мераю айфонамі»

«Пасля гэтага яшчэ безліч планаў! — расказвае з запалам Маргарыта. — Мяне чакаюць у тэатры, мяне завуць на канцэрты. І яшчэ: я не оперная дзіва, я — дзІвачка. Маленькая таму што. Мой дырэктар, Аляксандр Чахоўскі, калі тэлефануе мне, заўсёды пачынае словамі: «Ты толькі не крычы, не панікуй, але…». І расказвае, што мне за два тыдні неабходна вывучыць новую партыю. Вучу. Хоць крычу і псіхую, але вучу, бо цяпер я магу сабе дазволіць займацца толькі тым, што падабаецца і быць там, дзе хачу быць».

Маргарыта і яе дырэктар Аляксандр Чахоўскі

Маргарыта прыгадвае гісторыю, калі яе папрасілі выступіць на карпаратыве.

«У сэнсе, гэта столькі каштуе, вы ж спяваеце ўсяго дзве арыі?» — сказалі мне. На што я адказала: «Так, але я гэта раблю крута». Вам патрэбны толькі арыі, тады запрасіце студэнтак кансерваторыі».

Маргарыта не саромеецца прызнацца, што яе выступы каштуюць дорага.

«Цяпер я мераю кошт сваіх выступленняў айфонамі. Нядаўна памяняла тэлефон на 10-ты айфон і прыкінула, колькі яшчэ тэлефонаў я б дазволіла сабе з заробку за выступленне. Некалькі. Слухайце, я вучылася спяваць 16 гадоў. Я магу дазволіць сабе гэта».

Маргарыта Ляўчук вырасла ў невялічкім пасёлку Страдзічы, што каля Брэста, спявала з дзяцінства. Пасля была і музычная школа, і музычны каледж, і Акадэмія музыкі.

«Опернай спявачкай быць не хацела ніколі. Наадварот, мяне раздражняў гэты піск оперных спявачак. Я думала, ну як так можна? А пасля ўбачыла ў тэатры оперу «Кармэн». Але не яна ў выніку стала маім любімым творам. Я цяпер у любым стане, нават разбудзі мяне ноччу, я заспяваю арыю Кунігунды з мюзікла Бернстайна «Кандыд». Настолькі мая гераіня, мой характар».

На пытанне, які ж характар у Маргарыты, яна адказвае проста: «Я Авен».

Быць Авенам для Маргарыты Ляўчук — гэта заўсёды гаварыць праўду, не баяцца свайго меркавання і нікому не верыць.

«На сцэне я салдат. Ні аднаму з гледачоў не цікава, што ў цябе адбываецца ў жыцці, што ты хворы, што няшчасны. Калі я выйшла на сцэну, я змагаюся. А што датычна таго, што кажуць у цябе за спінай, мае перажыванні на гэты конт развеяла мая выкладчыца».

Педагог расказала, што калі была маладзейшай, у тэатры хадзілі плёткі пра яе настолькі недарэчныя і крыўдныя, што маладая тады вакалістка чырванела, перажывала і плакала. Але мінула ўсяго некалькі год і неяк паступова гаварыць сталі радзей і радзей. Пакуль ты малады і знакаміты — ты цікавы ўсім.

«Так што хай гавораць! Ха! Гэта ж опера. Вы што? Тут такі свет інтрыг і плётак, любы шоу-бізнес пазайздросціць. Але я ў пэўны момант зразумела, што змагацца з плёткамі пра сябе бессэнсоўна, таму я проста падліваю масла ў агонь. У вас раман з тым тэнарам? Канечне! Вы сустракаецеся з вашым партнёрам па спектаклі? Ну што вы? Я пераехала да яго жыць! Абажаю бачыць гэтую разгубленасць на тварах сваіх «добразычліўцаў». А праўды ўсё адно не даведаецца ніхто!»

- «А ў чым усё ж праўда? Ваша сэрца занятае?

«Я маладая, прыгожая, з выдатнай фігурай, разумная і багатая. Вы думаеце, такая жанчына можа быць адна? Ніколі ў жыцці! Канечне, сэрца занятае. Для мяне ў адносінах важна было, каб мой мужчына мяне любіў, а не дзяўбаў мне мозг. І самае галоўнае, каб ён мог мяне рассмяшыць. А то ёсць такія, якія пачынаюць істэрыць, калі трэба было ў спектаклі цалавацца з партнёрам. Спрабуюць забараняць. Я ў асабістых адносінах каралева. Я сама вырашу, што мне рабіць і забараняць мне не можа ніхто!»

Пытанне, калі яна будзе ў Мінску, пакуль адкрытае.

У Мінск — на канцэрт Макса Каржа

«Натуральна, прыеду на некалькі дзён і з’еду зноў. Планую ў ліпені паўдзельнічаць у пастаноўцы оперы Манюшкі «Verbum nobile», якую «Музычны Дом «Класіка» ставіць пад адкрытым небам на хутары «Дудара». Калі супадзе графік, то абавязкова схаджу на канцэрт Макса Каржа ў Мінску».

- «Макс вам нешта адказаў на гэты выступ? Звязваўся з вамі?»

«Я вас прашу! Я думаю, што ён не бачыў нават таго выступу! Ён жыве сваім жыццём, робіць класную музыку і не звяртае ўвагу на тое, што адбываецца навокал. Але я падпісаная на яго ў сацсетках».

На пытанне, ці можа так здарыцца, што Маргарыта можа змяніць оперную сцэну на эстраду, оперная дзіва адказвае, што ні ў якім разе.

«Беларуская опера цяпер на такім уздыме! Новыя пастаноўкі, новыя рэжысёры. Салісты запатрабаваныя не толькі ў Беларусі, але і за мяжой. Я так ганаруся сваімі калегамі. І вельмі прыкра, што мала хто ведае, што беларускія оперныя спевакі — лепшыя ў свеце. Яны перамагаюць у самых прэстыжных конкурсах. А гэта вам не якое-небудзь «Еўрабачанне». Мне часам хочацца ў замежных паездках адкрываць дзверы нагой з беларускім пашпартам у руках і крычаць з парога: «Я — беларуска!»

Беларуская мова — мая. Чаму я павінна яе забывацца?

І пасты ў інстаграме ў Маргарыты па-беларуску.

Посмотреть эту публикацию в Instagram

Мае правiлы жыцця‼️‼️‼️‼️‼️ Здзіўляцца я магу ўсяму, чаму заўгодна, але толькі не сваім поспехам. Што ім здзіўляцца, калі працуеш амаль 24 гадзіны ў суткі. І святкаваць перамогі я доўга не магу, іншым разам можна прайграць. Прыемна, але трэба ісці далей. Адзін літоўскі тэнар мне распавёў гісторыю, як на адным вакальным конкурсе "завалілі" шмат каго з перспектыўных. Перамога дасталася грузінскаму спеваку. Праз пару гадоў "заваленыя" спявалі па ўсім свеце ў операх, а пра таго грузіна ніхто нічога не чуў. Жартавалі, што ён дагэтуль святкуе тую перамогу. 〰〰〰〰〰〰〰〰〰〰〰〰〰〰 Мои правила жизни‼️‼️‼️‼️‼️ Удивляться я могу всему чему угодно, но только не своим успехам. Что им удивляться, когда работаешь почти 24 часа в сутки. И праздновать победы я долго не могу, в другой раз можно проиграть. Приятно, но надо идти дальше. Один литовский тенор мне поведал историю, как на одном вокальном конкурсе «завалили» многих перспективных. Победа досталась грузинскому певцу. Через пару лет, «заваленные» пели по всему миру в операх, а про того грузина никто ничего не слышал. Шутили, что он всё ещё празднует ту победу. ➡️Идея, текст, фото: @tatyana_mienskaja 💄Hair&MUA: Надежда Слижевская @euroradio #маргариталевчук #правилажизни #euroradio #muzzicdom #soprano #operasinger #operasingerofinstagram

Публикация от Margarita Levchuk (@margarita.levchuk.official)

«Гэта мая мова. Чаму я павінна на яе забывацца і саромецца? Іншая справа, што даводзіцца дубляваць у інстаграме на рускую ці англійскую. Не ўсе сябры — беларусы. А тое, што за мяжой заўсёды просяць выканаць што-небудзь беларускае, то гэта заўсёды калі ласка».

Маргарыта прызнаецца, што часцей за ўсё па просьбах замежнікаў выконвае дзве беларускія песні. «Купалінку» і «Калыханку».

«Пакрысе, на расе…» Замежнікам падабаецца. Заўсёды рэакцыя «Ваў». Ды не толькі беларускія песні ім падабаюцца. Перад Новым годам у нас быў выступ у Вільнюсе. Аркестр цудоўны, дырыжор Мадэстас Пітрэнас. Ведаеце, такі кайф, калі табе не трэба перажываць за аркестр. Ты проста выходзіш і насалоджваешся музыкай. Дык вось. Пасля канцэрту — банкет. Да мяне падыходзіць жанчына-музыкантка. І кажа: «Нам калі сказалі, што саліраваць будзе нейкая дзяўчынка з Беларусі, у аркестры былі размовы накшталт: «І што гэта? Што там могуць умець у той Беларусі?». Але калі вы ўзялі першую ноту, стала зразумела, што працуем з Талентам і Прафесіяналам».

Маргарыта з літоўскім дырыжорам Мадэстасам Пітрэнасам

У няпростай працы опренай спявачкі, расказвае Маргарыта, ёсць таксама свае мінусы.

«Арэхаў нельга есці перад выступленнем. Раптам закашляюся. Для голаса шкодна. І самая вялікая праблема, — смяецца Маргарыта, — часам не хочацца апранаць канцэртную сукенку ў другі раз».

Маргарыта кажа, што яна не шапаголік.

«Ды не люблю я хадзіць па магазінах. А наогул, ведаеце, пра што мару?»

- Сольны канцэрт у «Метраполітэн-опера»?

«Ха, ну гэта зразумела. Гэта ў планах. Але мару, каб у мяне быў асобны памочнік па валасах і макіяжы. Хаця, вось нашы мужчыны ў тэатры наадварот робяць кампліменты, калі я прыходжу не нафарбаваная. Ніякага стымулу навучыцца рабіць гэта самой!».