Спецназ УСУ паказаў, як спыняў калону РФ падчас наступу на Кіеў

Група высунулася на перахоп і адразу арганізавала засаду.

Спецназаўцы УСУ распавялі аб першых днях поўнамаштабнага ўварвання Расеі ва Украіну. Вайскоўцы 3-га асобнага палка спецпрызначэння імя князя Святаслава Храбрага спынілі рух калоны расейцаў, якая рухалася з боку Чарнобыля праз Барадзянку - Макараў - Жытомірскую трасу ў бок Кіева. Сілы спецыяльных аперацый УСУ паведамілі падрабязнасці ў Telegram.

Байцы 27 лютага 2022 года атрымалі заданне спыніць рух калоны, якая рухалася з боку Чарнобыля праз Барадзянку - Макараў - Жытомірскую трасу ў бок Кіева. Непасрэдныя ўдзельнікі тых падзей згадваюць, што фактычна з калонай мусілі “зрабіць “хоць нешта”.

Група на двух "Хамві" і "Казаку" высунулася на перахоп і адразу арганізавала засаду. Па дарозе да іх далучыліся калегі са 142-га навучальнага цэнтра ССА.

Байцы мелі ў арсенале гранатамёты, буйнакаліберны кулямёт і стралковую зброю. Пасля абаронцы пачалі абмяркоўваць план для дзеянняў. Колькасць тэхнікі абаронцам была невядомая.

“Фактычна там было 370 адзінак тэхнікі”, - распавёў баец пад псеўданімам “Духоўны”.

Вайсковец дадаў, што падчас першага стралковага бою акупанты зразумелі, што лёгкага шпацыру не будзе. У калоне пераважна былі БМП, БМД і танкі.